بيت من قصيدة الغربه للشاعر رحيم المالكي

عابس العراق


الهواجس عالهواجس لطمت اليوم

وصعب ماينوصف حال الهواجس

شكت زيجهه ومكابله البيت

وسود شفت بيت الشعر لابس

وشفت زاخو اعله فكدك شابك الهور

وعلى نهر الشعر تبجي النوارس

ومو بس الجوامع كبرت ليك

لان شاعر بجت حته الكنائس

العراق وياك يمشي اشلون عافاك

اشلون ايعوفك انته بغير حارس

وحرسته العمر كله ودارسه سنين

ونجحت ابحبه اول موش خامس

يالمادح محمد وكت الاصنام

وفوك اجم هبل شفناك دايس

يالراضعه الدمعه وعاشك الموت

ويم بيت الصدر صعبات دارس

عابس بالحسين انجن يكولون

ونته بحب عراقك صرت عابس

يامجنون ليلى وليلى بغداد

وصرت مجنون ليلى ابلا منافس

جوادر كلهه الك منصوبه الكلوب

وفواتح شفنه الك نص المدارس

وحارت ربعك اليافاتحه اتروح

واجت مذهوله ناسك للمجالس

وجفهه ايريد جفك حكهه يشتاك

خذت شمره اعله جفك بس تطالس

اصابع ايد وكتك ونته صايوغ

ولبست الوكت اجمل محابس

يعريس المنصه الراحت وياك

واجتك للنجف كومة عرايس

وذكرت احجايتك وتغير الحال

( ليش الوحدك من غير جناز)

ليش الوحدك تسال امس بيك

مو وحدك مشيت اخوانك وياك

وربعك يارحيم اعيون تبجيك

واجه ابكبره الشعر وياك جناز

تطلبه انته شكثر رايد يوفيك

وكلهه اتريد منك جانت اتكوم

وتوكف عالمنصه وانته ترثيك

لان شنريد نحجي وانته موجود

وفشله اعله اليسولف بيش ينعيك

ليش استعجلت لو منتظر يوم

نشبع شوف منك نلطم اعليك

وصاحت صوت ربعك بجت الكاع

اوكف يارحيم وخل نوصيك ؟؟؟

الفرات وياك اخذهه اقراهه لحسين

حته امن الفرات ايكوم يرويك

حته امن الفرات ايكوم يرويك
0000000000000000000000000000000000000
ملاحظه

ماموجود بين الاقواس

هو
بيت من قصيدة الغربه للشاعر رحيم المالكي

الفاتحه

لشعرائنا الشهداء جميعا

واخص بالذكر

الشاعر الشهيد ريسان النايف
الشاعر الشهيد سمير الزركاني
الشاعر الشهيد بارق العاشقي
الشاعر الشهيد غني محسن البهادلي
الشاعر الشهيد رحيم الماكي
والى جميع الشهداء